നാട്ടറിവുകളുമായി കണക്കനാര്‍പ്പാട്ട് !
ഇന്ന് ലോക നാട്ടറിവ് ദിനമാണ്. മനുഷ്യന്‍ നൂറ്റാണ്ടുകളുടെ അനുഭവങ്ങളിലൂടെ നേടിയെടുത്ത നാട്ടറിവുകളെ സംരക്ഷിക്കുകയെന്നതാണ് ഈ ദിനത്തിന്‍റെ ലക്ഷ്യം. ഗ്രാമീണ ജനതയുടെ അറിവുകളാണ് നാട്ടറിവുകള്‍. കൃഷി, വിശ്വാസം, ആചാരം, സംസ്കാരം തുടങ്ങിയവയൊക്കെ ഇവയില്‍ ഉള്‍പ്പെടും.
നാട്ടറിവുകളില്‍ ഏറെ പ്രധാനപ്പെട്ടവയാണ് കാര്‍ഷിക രംഗത്തെ അറിവുകള്‍. നൂറ്റാണ്ടുകളുടെ അനുഭവ സമ്പത്താണ് കാര്‍ഷിക രംഗത്ത് മനുഷ്യനുളളത്. ആധുനിക കാര്‍ഷിക രീതികള്‍ക്കിടയിലും പാരമ്പര്യ കാര്‍ഷിക രീതികള്‍ പിന്തുടരുന്നവരുണ്ട്. അവരുടെ അടിസ്ഥാനം നാട്ടറിവുകളാണ്. അത്തരത്തിലുളള നാട്ടറിവുകളുമായി ശ്രദ്ധേയമാവുകയാണ് കണക്കനാര്‍പ്പാട്ട് എന്ന നാടന്‍പാട്ട്.
പാലക്കാട്, മലപ്പുറം, തൃശ്ശൂര്‍ ജില്ലകളില്‍ കാര്‍ഷിക രംഗത്ത് പണിയെടുത്തിരുന്ന ജനവിഭാഗത്തിന്‍റെ തലവനായിരുന്ന കണക്കനാരെ കുറിച്ചുളള പാട്ടുകളാണ് കണക്കനാര്‍പ്പാട്ടുകള്‍. പഴയകാലത്തെ കാര്‍ഷിക പ്രവര്‍ത്തനങ്ങള്‍ വളരെ ലളിതമായി നാട്ടുവഴക്കങ്ങളിലൂടെ അവതരിപ്പിക്കുന്നവയാണ് കണക്കനാര്‍പ്പാട്ടുകള്‍.
കണക്കനാരെ വാഴ്ത്തുന്ന വാഴ്ത്തുപാട്ട്, വള്ളുവനാടന്‍ കലാരൂപമായ ചുവടുവെച്ചുകളിപ്പാട്ട്, ഉറക്കുപാട്ട്, കെട്ടിപ്പാട്ട് എന്നിങ്ങനെ പലവിഭാഗങ്ങളില്‍ ഉള്‍പ്പെടുന്ന കണക്കനാര്‍പ്പാട്ടുകള്‍ ഉണ്ട്. എന്നാല്‍ എല്ലാത്തിലും കൃഷിയും വയലും അനുബന്ധ തൊഴിലുമൊക്കെത്തന്നെയാണ് പ്രധാനമായി ഉളളത്‌.
പഴയ രീതിയില്‍ ചിട്ടപ്പെടുത്തിയവയാണ് കണക്കനാര്‍പ്പാട്ടുകള്‍. കഴിഞ്ഞ ദിവസങ്ങളില്‍ സോഷ്യല്‍ മീഡിയയില്‍ അവതരിപ്പിക്കപ്പെട്ട ചില പാട്ടുകള്‍ക്ക് വലിയ പിന്തുണയാണ് ലഭിക്കുന്നത്. ഇത് ഇത്തരം പാട്ടുകളെ ഇന്നും ജനങ്ങള്‍ ഇഷ്ടപ്പെടുന്നുവെന്നതിന്‍റെ തെളിവാണ്. അധ്യാപകനും എഴുത്തുകാരനുമായ താജിഷ് ചേക്കോട് ചിട്ടപ്പെടുത്തിയ കണക്കനാര്‍പ്പാട്ടുകള്‍ ശ്രദ്ധേയമാണ്. വി.കൃഷ്ണന്‍ അരിക്കാട്, ഒതളൂര്‍ മോഹനന്‍, വിജിഷ് കിഴൂര്‍ തുടങ്ങിയവര്‍ ഇത് വേദികളിൽ പാടുന്നുണ്ട്.
No comments:
Post a Comment